හරක් හෙවිල්ල

අපේ ගම බොහෝම ලස්සන පැත්තක්.කුරුඳු වවල හැම තැනම. කුඹුරු ගොවිතැනුත් කරනව. ඉස්සර අපි ගමේ යනකොට යන්නෙ අලුත්ගමට අවිත් එතනින් ඇල්පිටිය බස් එකක් අරගෙන..එහෙම නැතිවුනත් කොළඹින් කෙලින්ම ඇල්පිටිය බස් තියෙනව. ඒත් ඒ දවස් වල දැන් තරම්  ප්‍රවාහන පහසුකම් ඒ පැතිවල දියුණු නැහැ. වාහනේකින් එනකොට එන්නෙ කොස්ගොඩට ඇවිල්ල එතනින් හැරිල. ඒ පාරෙ එනකොට පාරෙ වම් පැත්තෙ ඌරගහට ලං වෙලා ඒ දවස් වල තිබුන "යුද්ධ පිට්ටනිය " කියල පොඩි පිට්ටනියක්. ඒකට එහෙම කියන්නෙ දෙවන ලෝක යුද්ධ කාලෙ ජපන්නු ලංකාවට බෝම්බ දානකොට එ පිට්ටනියට බොම්බ දෙකක් දාල තිබුන නිසා. මෑතක් වෙනකන් බෝම්බ පිපිරිලා හෑරිච්ච වලවල් දෙක තිබිල තියෙනව. දැන් නම් එතන යුද්ධ පිට්ටනියක් නැහැ. ගෙවල් හදල තියෙන නිසා.තව ඒක ප්‍රසිද්ධ වුනේ ඒ දවස් වල ගුවන් හමුදාවෙ හෙලිකොප්ටරයක් එතන්ට බාල තියෙන නිසා.

දැන් මම මෙ කියන්න හැදුව කතාව වෙලා තියෙන්නෙ පරම්පරා දෙකකට විතර ඉස්සර.කාලෙ හරියටම කියන්න බැරි නිසා තමයි පරම්පරා වලින් කිව්වෙ. මේක වෙලා තියෙන්නෙ අපෙ අම්මගෙ  දුර නෑයෙක් වෙන මාම කෙනෙක්ගෙ තාත්තට. අපේ ගම් ප්‍රදේශයේ ඉස්සර හිටපු දේව පතිරාජ කියල ඇමති කෙනෙක් සම්බන්ධව ජනකතා ගොඩක් තියෙනව. නිධන් වලලපු කතා වගේ දේවල් තමයි ගොඩක් තිබිල තියෙන්නෙ. ඒ වුනාට කට්ටිය නිදන් හාරන්න ඌරගහ යන්න ලෑස්ති වෙන්න එපා. තවමත් ඒ දේව පතිරාජ ඇමතිගෙ බලපෑම තියෙනව කියල තමයි කියන්නෙ. ඒ දවස් වල මිනිස්සු හරක් දිගේලි කරනව කියල කරල තියෙන්නෙ කැලේට යවපු එක. උදෙන්ම කැලේට යවල හවසට එක තාලෙකට හූවක් කිව්වම ඒ හූ සද්දෙට හරක් එනව ස්වාමියව හොයාගෙන. දවසක් මේ සීය හරක් ටික ඒ වගෙ හවස ගන්න ගියාම එක හරකෙක් ඉඳල නැහැ. ඉතින් සීය කරල තියෙන්නෙ හරකව හොයාගෙන කැලේට රිංගපු එක. ඔහොම හරකව හොයාගෙන හොයාගෙන කැලෙ මැද්දට ගියාම හම්බවුනාලු කැලේ මැද්දෙ පලතුරු වලින් මල් වලින් පිරුනු උයනක් වගෙ තැනක්.  දැන් ඇවිදල ඇවිදල මහන්සියි. බඩගිනියි. සීය ඉතින් ඒ පලතුරු වත්තෙන් පලතුරු කාල බඩපිරුනම සීයට දැන් "දොට්ට පිලට යන්න ඕන වුනාලු ". සීය මොකද කරේ අර උයනෙම ඉතින් වැඩේ අහවර කරාලු. වැඩේ ඉතින් අමාරු වෙලත් නැහැ. මොකද සීයා ඇඳගන ගිහින් තිබුනෙ අමුඩයක් නිසා. කොහොම හරි ඉතින් ඔක්කොම ඉවර වෙලා සීයා ඉතින් හරකව හෙවිල්ල පොස්ට්පෝන් කරල ගෙදර යන්න ලෑස්තිවෙලා යනවලු යනවලු සීයට ගෙදර යන පාර හොයාගන්න බැහැලු. කොච්චර කැලෙන් එලියට යන්න උත්සහ කරත් කැරකිලා එන්නෙ උයනට. සීය දැන් හත් අට පාරක් එක එක පැති වලින් ගියාලු  කොහෙන් ගියත් කැරකිලා එන්නෙ උයනට. දැන් සීයට මහන්සියි. කරගන්න දෙයක් නැහැ ගහක් යට වාඩිවෙලා ගිමන් ඇරිය. ඊට පස්සෙ  මහන්සියට සීයට නින්ද ගිහින් තියෙනව. එතකොට සුදු ඇන්ද ගත්ත මනුස්සයෙක් හීනෙන් ඇවිල්ල සීයට කිව්වලු " තොට බඩගින්නට කන්න දුන්නත් මදිවට මෙතන රීලත් යනව. යනකොට එකත් අරන් පලයන් " කියල. එ එක්කම සීය බය වෙලා ඇහැරිලා ඉතින් මොකද කරේ අමුඩ ලෙන්සුව ගලවල අර හෙලපු අමුද්‍රව්‍ය ඔක්කොම එකෙ දාගත්තලු. දාගෙන එනකොට තමයිලු ගමට යන පාර පෙනුනෙ.ඉතින් එහෙම සෑහෙන්න දුර ඇවිල්ල ගමට කිට්‍ටු කරල තමයිලු ඒ අමුඩ ලේන්සුව හිස් කරල හොදගත්තෙ. එතකොට ගමට  ලං වුනාම නැතිවෙච්ච හරකවත් හම්බවුනාලු.